Prófa- og verkefnareglur

Meginregla skólans er að nemendur beri ábyrgð á námi sínu og hafi vönduð vinnubrögð, heiðarleika og fagmennsku að leiðarljósi. 

Í skólanum gilda siðareglur og reglur um heiðarleg vinnubrögð í námi. 

Ef nemandi er staðinn að því að

• nota óleyfileg gögn eða tækni (þar með talda gervigreind)
• veita eða þiggja aðstoð frá öðrum

verður úrlausn hans ekki metin og telst hann fallinn í viðkomandi verkefni og/eða prófi.  Upplýsingar um málið eru skráðar í athugasemdakerfi Innu. Ítrekuð brot geta leitt til brottvísunar úr skóla.  Athugið að brot á þessari reglu fyrnast ekki á milli anna eða áfanga. Dæmi: Ef nemandi brýtur af sér í einum áfanga á 1. önn og í öðrum á 3. önn teljast það tvö brot. 

Vísað er til reglna skólans um: Meðferð ágreiningsmála og viðurlög við brotum á skólareglum.

Reglur á námsmatsdögum
Eftirfarandi reglur gilda á námsmatsdögum í desember og maí:

• Nemandi á að mæta stundvíslega í rétta stofu. Nemendum er raðað fyrir fram í prófstofur. Nemendur sjá nafnalista fyrir hvert próf undir „aðstoð“ í Innu og í hvaða stofu hver og einn á að mæta. Nafnalistinn er vistaður undir „aðstoð“ í Innu u.þ.b. tveimur dögum fyrir próf. Nemendur sem hafa skráð sig hjá námsráðgjöfum í sérstofu taka prófin sín í stofu M17.

• Prófin eru almennt 60 mínútur að lengd en nemendum stendur til boða að ljúka þeim á allt að 90 mínútum. Nemendur mega ekki yfirgefa prófstofu fyrr en 60 mínútur eru liðnar af próftímanum en ef þeir kjósa að vera lengur er næst hleypt út 15 mínútum síðar. Nemendur sem kjósa að vera lengur sitja allan próftímann (90 mínútur).  Þetta er gert til þess að skapa meira næði í prófstofum. 

• Nemandi skal rita nafn sitt á viðverumiða sem liggur á borði hans í upphafi prófs.
  
  
• Veikindi á að tilkynna strax að morgni prófdags með símtali á skrifstofu skólans. Vegna álags á heilsugæslu nægir að foreldri/forráðamaður staðfesti veikindi samdægurs (hringja áður en próf hefst). Sama gildir um nemendur sem eru 18 ára og eldri. Ef veikindi eru ekki staðfest af foreldri/forráðamanni þarf að leggja fram læknisvottorð dagsett sama dag. Vottorðum skal skila rafrænt á netfangið kvennaskolinn@kvenno.is.

• Nemandi á aðeins rétt á sjúkraprófi ef veikindi hafa verið staðfest með ofangreindum hætti eða ef hann hefur fengið sérstaka heimild frá skólastjórnendum af öðrum ástæðum.

• Kennarar í yfirsetu ákveða sætaskiptan í prófstofum.

• Ef nemandi er staðinn að því að nota óleyfileg gögn, veita eða þiggja hjálp frá öðrum nemanda verður úrlausn hans ekki metin og telst hann fallinn í viðkomandi prófi.   

• Nemendum er óheimilt að hafa farsíma, snjallúr, heyrnartól eða önnur sambærileg snjalltæki á sér í prófi. Slík tæki teljast óleyfileg gögn. Verði nemandi uppvís að því að hafa slík tæki í prófi telst það svindl og leiðir til falls í viðkomandi prófi. Ef nemandi skilur tæki eftir í yfirhöfn, tösku eða símakassa á kennaraborði er það á eigin ábyrgð. Nemendur skulu sýna sérstaka tillitsemi meðan próf standa yfir, fara hljóðlega af prófstað og er óheimilt að dvelja á göngum fyrir framan prófstofur á prófatíma.