Reglur um námsframvindu

Kvennaskólinn í Reykjavík er framhaldsskóli með bekkjakerfi sem býður upp á nám á fjórum námsbrautum: Félagsvísindabraut, náttúruvísindabraut, starfsbraut og íslenskubraut fyrir nemendur af erlendum uppruna.

Félags- og náttúruvísindabraut
Félags- og náttúruvísindabraut eru bóknámsbrautir til 200 eininga stúdentsprófs á þriðja þrepi þar sem námstíminn er sveigjanlegur, 3-4 ár. Nemandi sem ætlar að ljúka náminu á þremur árum þarf að jafnaði að ljúka um 67 einingum á hverju skólaári. Ef nemandi kýs að vera 3,5 eða 4 ár geta einingar skólaárs verið færri.

Til að mega flytjast á milli námsára þarf nemandi að uppfylla eftirfarandi skilyrði:

  1. Vegið meðaltal lokaeinkunna allra áfanga skólaársins þarf að vera að lágmarki 5,0.
  2. Lokaeinkunn hvers áfanga má ekki vera lægri en 5.
  3. Ljúka verður a.m.k. 50 einingum á skólaári.
  4. Ljúka verður öllum áföngum sem kjarnaáfangar næsta skólaárs byggja á.

Nemandi sem endurtekur bekk vegna falls á námsári þarf ekki að endurtaka þá áfanga sem hann hefur lokið með einkunninni 7 eða hærri. Áfanga sem er stakur í grein eða er lokaáfangi greinar þarf ekki að endurtaka sé einkunn áfangans 5 eða hærri. 

Ef nemandi kýs að nýta sér sveigjanleg námslok skal hann snúa sér til áfangastjóra eða náms- og starfsráðgjafa og skipuleggja námsferil sinn í samráði við þá.

Íslenskubraut

Íslenskubraut er fyrir nemendur af erlendum uppruna á framhaldsskólastigi. Námið á brautinni er 2 ár og er megináhersla lögð á íslenskukennslu á 1. og 2. þrepi (A1-B1 skv. Evrópska tungumálarammanum).

  • Kennsla fer fram í bekkjarkennslu og til að geta hafið nám á 2. ári þurfa nemendur að hafa lokið eftirfarandi áföngum 1. árs: ÍSAN1ÍA10, ÍSAN1ÍD10, ÍSAN1ÍC05 og ÍSAN1ÍF05.
  • Nemendur sem staðist hafa kröfur um námsframvindu og reglur um skólasókn eru sjálfkrafa skráðir í skólann á 2. ár og þurfa ekki að sækja sérstaklega um skólavist.

Starfsbraut
Starfsbraut Kvennaskólans í Reykjavík er fjögurra ára nám ætlað nemendum sem þurfa sérhæft nám sem mætir færni þeirra. Námið er einstaklingsmiðað og geta námsáherslur og þátttaka í áföngum verið mismunandi á tímabilum. Námið er á fyrsta þrepi, þ.e. almenn og hagnýt þekking sem miðast við stöðu hvers og eins. Nemendur sem uppfylla skilyrði geta tekið áfanga á öðrum námsþrepum og námsbrautum.