Skólareglur Kvennaskólans í Reykjavík

Almennar reglur

Gildi skólans eru umhyggja, ábyrgð og fjölbreytileiki. Kvennaskólinn er sameiginlegur vinnustaður okkar allra. Við erum öll fyrirmyndir og berum öll ábyrgð á að skapa gott umhverfi fyrir menntun og vellíðan.

Gagnkvæm virðing, kurteisi, heiðarleiki og ábyrgð skulu ríkja í samskiptum nemenda og starfsfólks.

Hvers konar ofbeldi og ósæmileg hegðun í garð annarra nemenda og starfsfólks er ekki liðin.

Vinnufriður á að ríkja í kennslustundum. Nemendur skulu mæta stundvíslega og undirbúnir í kennslustundir með viðeigandi námsgögn, vera virkir og lúta verkstjórn kennara..

Notkun farsíma og annarra snjalltækja í kennslustundum er óheimil nema því aðeins að hún sé í þágu kennslunnar og háð samþykki kennara hverju sinni. Nemendum er ekki heimilt að taka kennslustund upp, hvorki að hluta né í heild, án vitundar og samþykkis kennara og allra sem í henni eru. Sama gildir um myndatökur. Þetta á einnig við um rafrænar kennslustundir.

Myndatökur og/eða upptökur af nemendum og starfsfólki skólans eru óheimilar án leyfis viðkomandi aðila.

Kennslustofum ber að skila snyrtilegum í lok kennslustundar. Nemendur og starfsfólk skulu fara vel með muni skólans, ganga vel um húsnæði og lóð hans og gæta fyllsta hreinlætis innan dyra jafnt sem utan. Spjöll og eða skemmdir sem nemendur kunna að vinna á húsnæði skólans eða eigum hans skulu þeir bæta að fullu.

Notkun tóbaks, rafrettna og nikótínvara er bönnuð í húsakynnum skólans, á lóð hans og samkomum og í ferðalögum á vegum skólans.

Í skólanum, á lóð skólans, á samkomum og eða í ferðalögum á vegum skólans skal enginn hafa áfengi eða önnur hugbreytandi efni um hönd né vera undir áhrifum þeirra.

Nemendur bera sjálfir ábyrgð á að kynna sér reglur, stefnur og starfsáætlanir skólans og kynna sér þær leiðir og möguleika sem þeir hafa til að koma málum sínum á framfæri.

Samþykkt í skólaráði 29. október 2025

Brot á skólareglum og viðurlög

Nemendum ber að kynna sér skólareglur. Vanþekking á reglunum leysir þá ekki undan ábyrgð.

Viðbrögð við broti á skólareglum geta verið eftirfarandi, eftir alvarleika brotsins: Munnleg ábending frá starfsmanni skólans, tiltal skólameistara, skrifleg áminning skólameistara, brottvikning úr kennslustund, brottvikning úr áfanga, breyting á námsfyrirkomulagi nemanda, breyting á þátttöku í félagslífi og brottvikning úr skóla um lengri eða skemmri tíma.

Við ítrekuð brot kemur til skriflegrar áminningar til nemandans og forráðamanns ef um ólögráða nemanda er að ræða. Nemandinn eða forráðamenn hans hafa andmælarétt telji þeir á sér brotið. Láti nemandi sér ekki segjast og haldi uppteknum hætti varðandi brot á reglum skólans getur komið til brottvikningar hans ef skólastjórnendur taka þá ákvörðun eftir umfjöllun um málið. Brot á almennum hegningarlögum verða kærð til lögreglu.

Sjá nánar í reglugerð nr. 326/2016 um ábyrgð og skyldur aðila skólasamfélagsins í framhaldsskólum og meðferð ágreiningsmála og viðurlög við brot á skólareglum.