Skólasetning: Móttaka nýnema og fræðsludagskrá

Það var mikil gleði hjá okkur í Kvennaskólanum í gær þegar Kolfinna Jóhannesdóttir skólameistari setti skólann með formlegum hætti. Það má segja að gleðin hafi verið tvöföld því fyrir hádegi mættu nýnemar en eftir hádegi fengum við til okkar eldri nemendur sem eiga sæti í nefndum nemendafélagsins

Skólameistari ávarpaði nýnema og veitti þeim góð heilræði fyrir nýtt skólastig. Hún ræddi meðal annars mikilvægi þess að líða vel í skólanum og að það væri í lagi að gera mistök. Þau gæfu af sér mikilvæga reynslu fyrir lífið. 

Hver og einn bekkur hitti svo sinn umsjónarkennara og fékk kynningu á öllu því helsta sem tengist skólastarfinu. Að því loknu fóru nemendur í Keðjunni, nemendafélagi skólans, með bekkina í kynnisferð um skólann og voru með hópefli sem endaði með grillveislu í porti Miðbæjarskólans.

Eftir hádegi tók við fræðsludagskrá fyrir eldri nemendur sem kosnir voru í nefndir og ráð á vegum nemendafélagsins síðastliðið vor. Fjallað var um ýmislegt sem kemur að stefnu skólans í hinum ýmsu málaflokkum, jafnrétti, persónuvernd og góð samskipti. 

Í dag miðvikudaginn 20. ágúst hófst kennsla samkvæmt stundaskrá hjá öllum nemendum skólans. Við biðjum ykkur öll að vera dugleg að skoða stundaskrána í Innu fyrstu dagana því stundum þarf að breyta stundaskrá/ kennslustofum með stuttum fyrirvara.

Að lokum viljum við minna eldri nemendur á að töflubreytingum (breyta vali) lýkur föstudaginn 22. ágúst. Hægt er að senda inn beiðni um töflubreytingar í gegnum Innu eða snúa sér til Bjarkar áfangastjóra eða Ásdísar aðstoðarskólameistara. Upplýsingar um kennda valáfanga má sjá undir "Aðstoð" í Innu og eins sjáið þið þar hvort orðið er fullt í einhverja hópa.

Myndir frá nýnemadeginum er hægt að sjá á Instagram síðu skólans.