Kvennaskólinn í fjórða sæti sem Stofnun ársins

F.v. Guðný Rún Sigurðardóttir fjármálastjóri, Ásdís Arnalds aðstoðarskólameistari, Björk Þorgeirsdóttir námstjóri og Kolfinna Jóhannesdóttir skólameistari.

Kvennaskólinn varð í fjórða sæti í flokki meðalstórra stofnana í Stofnun ársins 2023 og er því ein af fyrirmyndarstofnunum ríkisins. Niðurstöður voru kynntar í gær á Hilton Reykjavík Nordica.

Kvennaskólinn hækkaði um fjögur sæti á milli ára en á hverju ári eru fyrstu fimm sætin í hverjum flokki verðlaunuð sérstaklega og fá sæmdarheitið Fyrirmyndarstofnun ársins þar sem þær þykja skara fram úr að mati starfsfólks á sviði mannauðsmála.

Við erum mjög stolt af þessari viðurkenningu og hún mun verða okkur hvatning til áframhaldandi umbóta í starfsumhverfi okkar. Þessi árangur er sameiginleg uppskera alls starfsfólks í Kvennaskólanum.

Stofnun ársins er samstarfsverkefni Sameykis, Kjara- og mannauðssýslu ríkisins, Mannauðs- og starfsumhverfissviðs borgarinnar og fjölmargra stofnana og starfsstaða. Í könnuninni eru þátttakendur spurðir út í níu þætti í starfsumhverfi sínu, þ.e. trúverðugleika stjórnenda, starfsanda, launakjör, vinnuskilyrði, sveigjanleika í starfi, sjálfstæði í starfi, ímynd stofnunar, ánægju og stolt og jafnrétti. Markmiðið með að velja fyrirmyndarstofnanir er að hvetja stjórnendur stofnana til að huga að mannauðsmálum og auka umræðu um aðbúnað og líðan starfsfólks á vinnustöðum. Sjá nánar um könnunina hér https://www.sameyki.is/kannanir/stofnun-arsins-2023/vinningshafar-riki-2023/