FRAN2YN03 - Yndislestur í frönsku

Einingafjöldi: 3
Þrep: 2
Forkröfur: FRAN1FC05 (eða FRAN1FB05 í samráði við kennara)
Meginmarkmið áfangans er að nemendur lesi frönsku sér til ánægju og gagns og þjálfist í að nota tungumálið til að tala um efni sem þau hafa lesið og kynnt sér. Áfanginn er að töluverðu leyti einstaklingsmiðaður þar sem nemendur velja að stórum hluta það efni sem þau vinna með í samráði við kennara. Áfanginn hentar því vel þeim nemendum sem langar að efla og dýpka frönskukunnáttu sína á eigin forsendum og kynnast betur mannlífi og menningu frönskumælandi landa. Unnið er með einfaldar skáldsögur, smásögur, ævintýri, barnabækur, myndasögur, tímaritsgreinar o.fl. Einnig horfa nemendur á a.m.k. eina kvikmynd eða nokkra sjónvarpsþætti og fjalla um myndefnið á svipaðan hátt og lesefnið. Ekki er um hefðbundnar kennslustundir að ræða heldur er áfanginn símatsáfangi þar sem nemendur kynna verkefni sín í viðtölum við kennara. Einnig vinna þau skriflegar samantektir um viðfangsefnin sem mynda safnmöppu sem skilað er í lok annar. Lögð er áhersla á sjálfstæð vinnubrögð og góða mætingu í viðtölin. Hægt er að velja áfangann sem 3 eða 5 einingar.

Þekkingarviðmið

Nemandi skal hafa öðlast þekkingu og skilning á:

  • ólíkum textagerðum, s.s. stuttum skáldsögum, smásögum, myndasögum, ævintýrum, barnabókum og tímaritsgreinum
  • þeim orðaforða sem nauðsynlegur er til að mæta hæfniviðmiðum áfangans
  • þeirri menningu sem er grunnur fyrir það lesefni sem kemur við sögu í áfanganum

Leikniviðmið

Nemandi skal hafa öðlast leikni í að:

  • lesa margs konar texta og vinna úr þeim á mismunandi hátt
  • skilja og túlka myndefni frá frönskumælandi löndum
  • kynna afmörkuð, undirbúin efni og taka þátt í samræðum um þau á frönsku
  • skrifa stutta samfellda texta, t.d. samantektir, draga ályktanir og tjá eigin skoðanir
  • nota hjálpargögn, svo sem orðabækur, við úrvinnslu texta

Hæfniviðmið

Nemandi skal geta hagnýtt þá almennu þekkingu og leikni sem hann hefur aflað sér til að:

  • fjalla á nokkuð ítarlegan hátt, munnlega og skriflega, um efni sem nemandi hefur valið sér og tjá eigin skoðanir
  • ræða um efni sem nemandi hefur kynnt sér á frönsku
  • vinna sjálfstætt og skipulega
  • meta eigið vinnuframlag
  • velja sér lesefni á hæfilegu þyngdarstigi og hafa trú á eigin kunnáttu
  • tileinka sér jákvætt viðhorf til frönskunnar og hafa trú á eigin kunnáttu í málinu
Nánari upplýsingar á námskrá.is