LÍFF2ÖR05 - Örverufræði

örverufræði

Einingafjöldi: 5
Þrep: 2
Forkröfur: Líff1GF04 eða Líff2GR05. Má taka áfangann samhliða undanförunum.
Í þessum valáfanga í örverufræði verður farið yfir stöðu örverufræðinnar innan náttúrufræðinnar; gerð og flokkun dreifkjörnunga og frumvera; lífsstarfsemi örvera, s.s. efnaskipti, æxlun og fjölgun, dreifingu; mikilvægi örvera í náttúrulegum vistkerfum; not fyrir örverur í iðnaði; skemmdir og sjúkdómar af völdum örvera og varnir gegn þeim; helstu flokkar baktería verða kynntir; frumatriði í veirufræði, s.s. staða veira í lífheiminum, gerð, fjölgun, áhrif veira á hýsla, veirusjúkdómar og varnir gegn þeim; flokkun sveppa og staða frumdýra í lífheiminum.

Þekkingarviðmið

Nemandi skal hafa öðlast þekkingu og skilning á:

  • einkennum og byggingu dreifkjörnunga og frumvera
  • grunnatriðum í flokkunarfræði örvera
  • notkun örvera í rannsóknum, lyfjaframleiðslu og iðnaði
  • smitleiðum og sjúkdómum af völdum örvera
  • helstu aðferðum við sjúkdómavarnir og sótthreinsun
  • stöðu veira í lífheiminum og samskiptum þeirra við hýsla
  • helstu aðferðum við einangrun, ræktun og greiningu örvera

Leikniviðmið

Nemandi skal hafa öðlast leikni í að:

  • greina helstu tegundir örvera á grundvelli einkenna þeirra
  • flokka örverur á grundvelli einkenna þeirra og niðurstaðna greiningarprófa
  • teikna einfalda skýringarmynd af dreifkjörnungi og merkt helstu frumulíffæri
  • taka örverusýni og búa þau til ræktunar
  • vinna með örverur á öruggan hátt
  • skrá niðurstöður athugana og setja fram í skýrslum

Hæfniviðmið

Nemandi skal geta hagnýtt þá almennu þekkingu og leikni sem hann hefur aflað sér til að:

  • auka skilning á almennri umfjöllun á sviði örverufræði
  • taka rökstudda afstöðu til dægurmála sem tengjast örverum
  • taka ábyrgð á eigin lífi m.t.t. sýkingarhættu og sjúkdóma af völdum örvera
  • afla sér frekari þekkingar á sviði örverufræði
  • gera sér grein fyrir samspili örverufræði og annarra náttúrufræðigreina
  • tengja örverufræðina við daglegt líf og umhverfi og sjá notagildi hennar.
Nánari upplýsingar á námskrá.is