Einingafjöldi: 5
Þrep: 3
Forkröfur: Einn FÉL eða SÁL eða UPP áfangi á 2. þrepi
Tómstundastarf gegnir mikilvægu menningar- og uppeldishlutverki í nútímasamfélagi. Tómstunda- og félagsmálafræði er ung fræðigrein og felur meðal annars í sér að tileinka sér þekkingu á gildi, þýðingu og hlutverki tómstunda fyrir fólk á öllum aldri í samfélaginu. Einnig fjallar greinin um rannsóknir á tómstundum og mikilvægi þeirra í þróun tómstundastarfs. Í áfanganum verður horft á tómstundastarf í sinni víðustu mynd, bæði úti og inni, tengt náttúru, umhverfi og samfélagi. Rýnt verður í hugmyndafræði unglinga- og þátttökulýðræðis. Í tómstundastarfi með börnum og unglingum er nauðsynlegt að þekkja til forvarna, til að mynda birtingarmynd eineltis og til hvaða ráða er hægt að grípa við lausn þeirra. Þetta á einnig við um forvarnir í tengslum við áfengis- og fíkniefnamisnotkun. Markmiðið er að öðlast heildarsýn yfir þá starfsemi sem fram fer í tómstundum barna, ungmenna og aldraðra og það menningar- og uppeldishlutverk sem tómstundastarf gegnir í lífi þeirra.
Þekkingarviðmið
Nemandi skal hafa öðlast þekkingu og skilning á:
- tómstundafræði samtímans í tengslum við íslenskt samfélag
- sögulegu yfirliti tómstundafræði
- helstu rannsóknum á tómstundastarfi
- mikilvægi rannsókna í mótun og þróun tómstundastarfs
- aðferðum sem koma að notum í tengslum við forvarnir í tómstundastarfi
- sérstöðu tómstundafræði, viðfangsefnum hennar og aðferðum
- mikilvægi tómstundastarfs og tengslum þess við farsælt uppeldi og vellíðan
Leikniviðmið
Nemandi skal hafa öðlast leikni í að:
- afla upplýsinga er tengjast rannsóknum á tómstundum og setja í fræðilegt samhengi
- nýta fræðilegan/vísindalegan texta á íslensku og ensku
- afla upplýsinga um tómstundir og tómstundastarf og nýta þær í hagnýtum verkefnum
- beita orðræðunni um tómstundir á ýmis viðfangsefni og á vettvangi
- miðla fræðilegu efni í ræðu og riti
Hæfniviðmið
Nemandi skal geta hagnýtt þá almennu þekkingu og leikni sem hann hefur aflað sér til að:
- vinna úr rannsóknargögnum og leggja mat á rannsóknir á tómstundum
- leggja mat á hagnýtar aðferðir sem henta við margvíslegar aðstæður í tómstundastarfi
- tengja rannsóknarniðurstöður við tómstundastarf á vettvangi
- beita grundvallaraðferðum í forvörnum og eineltismálum
- taka þátt í rökræðum um tómstundastarf
- meta eigin frammistöðu og vinnuframlag sem og annarra á gagnrýninn hátt
- setja fram þekkingu sína í ræðu og riti
Nánari upplýsingar á námskrá.is