JARÐ2AJ05 - Almenn jarðfræði

Í þessum áfanga í almennri jarðfræði er fengist við innræn og útræn öfl. Unnið verður að því að skapa þekkingu á þeim ferlum sem eru að verkum á og undir yfirborði jarðar. Fræðileg umfjöllun greinarinnar verður tengd við þau ummerki sem hvarvetna eru sýnileg í landslaginu í kringum okkur og þannig reynt að skapa áhuga og skilning á umhverfinu og notagildi jarðfræðiþekkingar í leik og starfi. Fjallað er um aðferðafræði, hjálpargögn og sögulega þróun í jarðfræði. Sérstaða og grunnhugtök eru kynnt: Staðfræði Íslands,innræn öfl, uppruni og afleiðingar, innri gerð jarðar, landrek, flekakenningin, sérstaða Íslands í jarðfræðilegu tilliti og þættir úr staðfræði landsins, eldfjallafræði, eldvirkni, flokkun bergs, eldstöðva og hrauna, jarðhitasvæði, útræn öfl, uppruni og afleiðingar, veðrun og rof, roföflin og ummerki þeirra. Grundvallarnálgun að viðfangsefninu snýst um að nemendur öðlist yfirsýn og þekkingu á þeim jarðfræðilegu lögmálum sem hvarvetna má sjá merki um. Með samtengingu texta og verkefna er leitast við að opna augun fyrir lögmálum jarðfræðinnar og auka skilning á því hvernig innræn og útræn öfl setja mark sitt á landslagið. Lífvana hluti jarðar í daglegu umhverfi nemendanna er settur í víðara samhengi og þannig reynt að gera þá meðvitaða um hvað og hvers vegna náttúrulegt umhverfi er eins og raun ber vitni og hvernig er líklegt að það þróist og hvaða máli sú þróun skiptir. Takmarkið er að gera nemendur læsa á umhverfið og þannig auka yfirsýn og skilning sem geta leitt til vitundar um og virðingar fyrir náttúrulegum ferlum. Jafnframt öðlast nemendur nauðsynlega grunnþekkingu og færni til frekara náms í jarðfræði.