Kvennaskólinn er menntaskóli sem býður upp á hefðbundið fjögurra ára bóknám til stúdentsprófs. Brautirnar eru þrjár, félagsfræðabraut, málabraut og náttúrufræðibraut. Skólinn byggir á bekkjarkerfi en við aukið val nemenda með tilkomu nýrrar aðalnámskrár frá 1999 blandast bekkir meira en áður var tvö síðustu árin. Því má segja að skólinn leitist við að sameina kosti bekkjar- og áfangakerfis. Þá er átt við að nú sem fyrr hafi nemendur aðhald og félagslegt öryggi bekkjarkerfisins um leið og þeir hafa meira svigrúm til að taka sjálfstæðar ákvarðanir og fara sínar eigin leiðir í náminu þegar fram í sækir. 

Venjuleg kennslustund við skólann er 60 mínútur. Tíminn nýtist því betur en ef um styttri kennslustundir væri að ræða og nemendur eru í færri námsgreinum á hverjum degi. Áhersla er lögð á að námið sé samfellt, markvisst og hæfilega sérhæft.

Menntun – þekking – þroski

Hlutverk framhaldsskóla

Samkvæmt lögum um framhaldsskóla frá 1996 er hlutverk framhaldsskóla landsins margþætt. Þeir skulu m.a. stuðla að alhliða þroska allra nemenda, búa þá undir störf í atvinnulífinu og frekara nám, efla ábyrgðarkennd, víðsýni, frumkvæði, sjálfstraust og umburðarlyndi nemenda, kenna þeim að njóta menningarlegra verðmæta og hvetja þá til stöðugrar þekkingarleitar (sbr. lög nr. 80/1996). Þessi lagaákvæði sem og slagorð skólans, menntun – þekking – þroski, hafa starfsmenn Kvennaskólans í Reykjavík að leiðarljósi í öllu starfi sínu, jafnt í kennslustundum sem í öðrum þáttum starfseminnar. Þannig er stuðlað að því að skila nemendum vel undirbúnum út í lífið.

Skólabragur Kvennaskólans

Skólabragur Kvennaskólans einkennist af heimilislegu andrúmslofti, jákvæðni, góðum samskiptum nemenda og starfsfólks og gagnkvæmri virðingu þeirra á milli. Leitast er við að stuðla að vellíðan allra í skólanum og koma til móts við ólíkar þarfir eftir því sem frekast er unnt. Um þetta bera umsagnir nemenda og kennara í könnunum síðustu ára glöggt vitni. Aðstoð við nemendur með námsörðugleika eða önnur sértæk vandamál er veitt eftir því sem kostur er og þar kemur öflug námsráðgjöf skólans oft við sögu. Reynt er að grípa í taumana og sporna gegn brottfalli áður en í óefni er komið hjá einstaka nemendum, án þess þó að slá af námskröfum skólans. Á þennan hátt vonast starfsmenn skólans til að hlúð sé að alhliða þroska, sjálfstrausti, umburðarlyndi og víðsýni hvers og eins.

Vönduð menntun

Eitt helsta markmið skólans er að veita nemendum haldgóða og vandaða menntun og undirbúa þá sem best undir frekara nám. Áhersla er lögð á góða kennslu, fjölbreytta kennsluhætti og ólík viðfangsefni. Gagnrýnin skapandi hugsun er í hávegum höfð, svo og sjálfstæð og öguð vinnubrögð. Þjálfun samvinnu er einnig ríkur þáttur í skólastarfinu. Samband árangurs og erfiðis í náminu er undirstrikað og nemendum gert ljóst að stöðug og góð vinna yfir veturinn reynist jafnan farsælust. Leitast er við að gera raunsæjar kröfur og veita nemendum uppbyggilega endurgjöf. Gott dæmi um vandaðan undirbúning undir framhaldsnám er svokölluð stúdentsritgerð, þ.e. stór heimildaritgerð sem nemendum gefst kostur á að rita í 4. bekk undir handleiðslu kennara með sérþekkingu á viðkomandi sviði og íslenskukennara. Hún hefur reynst útskrifuðum nemendum undanfarinna ára gott veganesti fyrir verkefnavinnu á háskólastigi. 

Tölvunotkun

Kvennaskólinn leggur áherslu á að allir nemendur verði handgengnir tölvunotkun við nám sitt og nýti sér sem best þá miklu möguleika sem upplýsingatæknin veitir. Þannig stuðlar skólinn m.a. að því að efla þekkingarleit nemenda og opna augu þeirra fyrir mikilvægi ævilangrar símenntunar.

Þróun og þekking

Í sama anda kappkosta stjórnendur og kennarar skólans að fylgjast vel með því sem hæst ber á sviði kennslumála, vinna að þróun námsáfanga og námsefnisgerð og viðhalda þekkingu sinni á sínu sviði, m.a. með margvíslegri endurmenntun. Síaukin áhersla hefur verið á notkun upplýsingatækni í kennslunni, m.a. með tilkomu innra nets (kennslukerfis) skólans frá og með hausti 2001, fartölvuvæðingu kennarahópsins og tölvum og skjávörpum í kennslustofum. Haustið 2004 var ný og endurbætt útgáfa af innra netinu tekin í notkun við skólann sem hlaut nafnið Laupurinn í framhaldi af almennri kosningu meðal nemenda og starfsfólks í ársbyrjun 2005. Þar geta kennarar sett inn á einfaldan máta kennsluáætlanir, ítarefni, gagnvirk verkefni og próf og einnig geta þeir tekið við verkefnum nemenda á tölvutæku formi, svo dæmi séu nefnd. Laupurinn er afrakstur þróunar sem hefur átt sér stað innan skólans á undanförnum árum undir stjórn Ágústs Valgeirssonar.

Alþjóðlegt samstarf

Töluvert er lagt upp úr alþjóðlegu samstarfi í Kvennaskólanum og á ári hverju eru yfirleitt fleiri en eitt samskiptaverkefni í gangi. Á síðustu árum hefur skólinn t.d. unnið með skólum frá Danmörku, Svíþjóð, Frakklandi, Þýskalandi, Belgíu, Írlandi, Rúmeníu og Tékklandi. Nemendur og kennarar hafa fengið heimsóknir frá og farið í heimsóknir til viðkomandi landa. Ennfremur hefur kór skólans farið í söngferðir utan landsteinanna. Þetta eykur víðsýni og samskiptahæfni nemenda og stuðlar að menningarlæsi. Kennarar og stjórnendur hafa einnig tekið þátt í þróunarverkefnum.

Menning og saga

Menning og saga koma víða við í skólastarfinu. Nemendur fá innsýn í menningarleg verðmæti á sviði bókmennta og lista, bæði í kennslustundum og í ýmsum öðrum þáttum starfsins. Nemendur fara í leikhús og flestir í vettvangsferð á vegum skólans a.m.k. einu sinni á vetri. Gömul hefð er fyrir því að halda söngsal, en þá leggst hefðbundin kennsla niður í eina kennslustund og allir nemendur og starfsfólk skólans safnast saman til fjöldasöngs. Undanfarin ár hefur þessi liður verið samtvinnaður evrópska tungumáladeginum, 26. september, þar sem sungin hafa verið lög á íslensku og þeim erlendu tungumálum sem kennd eru við skólann. Margir njóta líka menningarviðburða af ýmsu tagi í félagslífi nemenda og allmargir taka þar beinan þátt í listsköpun, t.d. með starfi í leikfélagi eða kór og þátttöku í árlegri söngvakeppni. Kvennaskólinn býr einnig að því að standa á gömlum merg og fléttast því margar gamlar hefðir inn í félagslíf nemenda. Hinn árlegi Peysufatadagur þriðjubekkinga með söngvum sínum og dönsum er t.d. vel til þess fallinn að glæða áhuga nemenda á þjóðlegum gildum. Starfsfólk skólans reynir almennt að stuðla að og taka þátt í heilbrigðu og góðu félagslífi nemenda.

Aðlögun í fyrirrúmi

Saga skólans og hefðir koma þó ekki í veg fyrir breytingar. Þvert á móti sýnir sagan að Kvennaskólinn hefur ávallt lagt metnað sinn í að aðlagast nýjum aðstæðum. Virkt sjálfsmat er mikilvægur þáttur þessa umbótastarfs því að þar koma styrkleikar og veikleikar starfsins glöggt í ljós. Stjórnendur skólans leitast við að taka tillit til þess sem fram kemur í formlegu jafnt sem óformlegu mati nemenda og starfsfólks þegar vinna þarf að breytingum. Þetta á t.d. við um þær breytingar á skipulagi námsbrauta og þar með bekkjarkerfinu sem gerðar hafa verið á síðustu árum í kjölfar gildandi aðalnámskrár.