Kvennaskóli Íslands

Franska er lykill að mörgum ólíkum menningarsamfélögum. Talið er að um 250 milljónir manna í heiminum tali frönsku. Þar af eiga tæplega 113 milljónir manna frönsku að móðurmáli, langflestir í Evrópu (um 67 milljónir) og næstflestir í Afríku (um 40 milljónir). Við þetta má bæta að í Kanada er franskan opinbert tungumál ásamt ensku og að u.þ.b. 13% íbúa Bandaríkja Norður-Ameríku eru af frönskumælandi uppruna.

       Góð frönskuþekking opnar ýmsar dyr, t.d. að víðfrægum háskólum og menntastofnunum. Franska er líka eitt mikilvægasta tungumálið innan Evrópusambandsins og getur auðveldað aðgang að ýmsum störfum hjá alþjóðlegum stofnunum og í alþjóðlegum viðskiptum.

       Með auknum útflutningi íslenskra fyrirtækja á franskan markað hefur störfum hér á landi þar sem frönskukunnátta er skilyrði fjölgað verulega. Það sama á við um alla starfsemi sem tengist ferðamönnum en fjöldi franskra ferðamanna hingað til lands hefur aukist töluvert á síðustu árum.

       Ekki má gleyma því að franskan er rómanskt tungumál ásamt latínu, ítölsku, spænsku, portúgölsku og rúmensku og að staðgóð kunnátta í einu þessara mála er eins konar lykill að öllum hinum.

       Boðið er upp á frönsku sem 3. mál á öllum brautum Kvennaskólans og 4. mál á málabraut (í eldra kerfi)/hugvísindabraut (í nýju kerfi) fyrir þá nemendur sem hafa þýsku sem 3. mál. Franska er kjörsviðsgrein á málabraut og býður Kvennaskólinn upp á nokkra framhaldsáfanga eftir nám í kjarna (sbr. eftirfarandi áfangalýsingar). Þar af eru FRA 603 og 703 bundið kjörsviðsval á málabraut. Nemendum á öðrum brautum býðst að bæta við sig frönsku í frjálsu vali eða sem kjörsvið annarrar brautar.

       Nemendur á málabraut hefja nám í 3. máli í 1. bekk en aðrir í 2. bekk. Kennsla í 4. máli á málabraut hefst í 3. bekk.

Að jafnaði eru kenndar fjórar klukkustundir á viku í öllum áföngum frönskunnar. Auk þeirra verða nemendur að gera ráð fyrir töluverðri heimavinnu enda krefst tungumálanám stöðugrar vinnu og sjálfstæðra vinnubragða nemenda. Lögð er jöfn áhersla á alla færniþætti (lestur, tal, hlustun og ritun) eftir því sem kostur er og efni hvers áfanga gefur tilefni til. Leitast er við að gefa nemendum tækifæri til að kljást við frönskuna með fjölbreyttum og lifandi hætti, m.a. með mismunandi kennsluaðferðum, verkefnum af ólíkum toga, tónlist og leikjum. Notkun upplýsingatækni og uppflettirita er mikilvægur þáttur í náminu. Reynt er að taka tillit til áhugasviðs nemenda í efnisvali, einkum í efri áföngunum. Strax frá upphafi venjast nemendur því að einföld tjáskipti fari fram á frönsku í kennslunni og eykst þáttur talaðrar frönsku smám saman þegar fram í sækir.  

Eins og í langflestum öðrum námsgreinum Kvennaskólans byggist námsmat í hinum mismunandi frönskuáföngum yfirleitt á símati annars vegar og lokaprófi hins vegar. Í flestum tilvikum skiptist lokapróf í munnlegt próf, hlustunarpróf og loks skriflegt próf. Þau tvö fyrstu fara fram í kennslustundum fyrir annarlok hverju sinni. Símat byggir á margvíslegum verkefnum, skyndiprófum, ástundun og mætingu. Meginviðmiðunin í námsmatinu er sú að gera færniþáttunum fjórum, tali, hlustun, lestri og ritun, jafn hátt undir höfði. Ef um veruleg frávik frá því er að ræða er þess getið hér á eftir en annars kemur nánari skilgreining á námsmati fram á kennsluáætlunum hverju sinni.

Ef nemandi stenst ekki námsmatskröfur áfanga og á rétt á endurtökuprófi að vori skal hann að jafnaði þreyta skriflegt próf, munnlegt próf og í sumum tilvikum hlustunarpróf.